“ආං මචං මරු කෑල්ලක් “

The name calling game

කාර්යාලයේදී හදුනාගත් මිතුරෙකුගේ විවාහ මංගලෝත්සවයකට වෙනුර පැමිණියේ උත්සවයට පෙර දිනයේදීය.මින් පෙර මිතුරාගේ නිවසට පැමිණ නොමැති හෙයින් වෙනුර මිතුරාගේ පවුලේ උදවිය හදුනාගෙන සිටියේද නැත. යහළුවන් පිරිවරා විහිළු තහළු මධ්‍යයේ සිටි වෙනුරට එක්වරම රූමත් යුවතියක දකින්නට ලැබිණි.

” ඒයි කවුද බන් අර…මාර කෑල්ලක්නෙ .” යනුවෙන් වෙනුරට කියවුණේ නිරායාසයෙනි. සැණින් ඔහුගේ කන රත් වෙන්න පහරක් වැදුණේ පසුදින විවාහ අපේක්ෂිත මිතුරාගෙනි.

“උඹ කවුද එහෙම කියන්න…ඒ මගේ නංගි”  ඉන් සිත් රිදීමට පත් වෙනුරට සිදුවූයේ ආපසු හැරී ඒමටය.

” මම එහෙම කීවේ කැත හිතකින් නෙමෙයි. අනික කොල්ලො සෙට් වුණාම ඔහොම කියනවනෙ.” යැයි වෙනුර පසුව සිය කාර්යාලීය මිතුරන් හා පවසා තිබුණි.

මෙවන් සිදුවීම් සමාජයේ විරල නොවන බව බොහෝ දෙනා අත්දැකීමෙන් දනිති. විශේෂයෙන් තරුණයන් විසින් තරුණියන්ව විවිධ නම් වලින් හැදින්වීම මේ වනවිටත් සාමාන්‍ය සිද්ධියක් බවට පත්ව තිබේ. කෑල්ල බඩුව අයිටම් එක එළ පාර කිරි ටොයියා  යනාදී විවිධ නම් යුවතියන් හැදින්වීට යොදා ගනී.

” මම පෙද්ගලිකව මේ වගේ නම් ගෑණූ ළමයින්ට කියනවට කැමති නැහැ. මොකද මටත් නංගි කෙනෙක් ඉන්නවා. මගේ නංගිට කවුරු හරි කෙනෙක් කෑල්ලක් කියලා කීවොත් මට උගේ හොම්බ පොඩි කරන්න හිතෙයි. හැබැයි අපිත් යාළුවො එක්ක සෙට් වුණහම කෙල්ලන්ට අනං මනං කියනවා. ඒක ඒ වෙලාවට විහිළුවට විතරයි. මට හිතෙන්නෙ ගැණූ ළමයිනුයි අපියි අතර තියෙන සම්බන්ධය මේ කතා වලට සෘජුව බලපානවා. අපි දන්න කෙනෙකුට කෑල්ලක් බඩුවක් කියලා කියන්නෙ නෑනේ” යැයි පෙෘද්ගලික බැංකුවක සේවයේ නියුතු කදුරුවෙල 23 හැවිරිදි ප‍්‍රදීප් නිශ්සංක පවසයි.

ගෑනු ළමයින්ට මේ නම් යෙදීමේදී ඇයගේ ස්වරූපය පිළිබද සැලකිළිමත් වන බව අවිස්සාවෙල්ලේ ඉන්දික ප‍්‍රකාශ කරයි. ඔහු තී‍්‍රවිල් රථ රියැදුරෙකි. ඉන්දිකට අනුව කෑල්ලක් ලෙස හදුන්වන්නේ රූමත් තරුණියකි. ලස්සන තරුණියක් දුටු විට “අන්න මචං කෑල්ලක් යනවා යැයි” පවසන බව ඔහු කියයි.

රූමත් තරුණියක් ඇගට හිර වන ලෙස ඩෙනිම් කලිසමක් හා ටී ෂර්ටයක් ඇද සිටී නම් ඇය මාර පාරකි නැතහොත් එළ පාරකි. බඩුවක් ලෙස හදුන්වන්නේ පිරිමි ළමයි කීප දෙනෙකු හා සබදකම් පවත්වන තරුණියක් හෝ ගණිකා වෘත්තියේ යෙදෙන්නියකට බව ඉන්දික පවසයි. ගණිකාවන් ගැවසෙන ස්ථාන බඩු පොට්ය. කිරි ටොයියා යනු ගණිකා වෘත්තියට අලුතෙන් පිවිසෙන්නියන්ය. .

එහෙත් මේ හැදින්වීම් නිශ්චිතවම කෙනෙකුට කිව නොහැකි බව ග‍්‍රෑන්ඩ්පාස්හි බුද්ධික නුවන් පවසයි. ඔහු කොළඹ විශ්වවිද්‍යාලයේ සිසුවෙකි.

” මේ දේවල් සමාජ ගත වෙලා තියෙන්නේ විවිධ උප සංස්කෘතීන් වල බලපෑම මත. බොහෝ දෙනා මේ නම් භාවිතා කරන්නේ තේරුමක් ඇතිවද කියන එක මට ප‍්‍රශ්නයක්. ඒත් දැන් ඒක සාමාන්‍ය දෙයක් වෙලා ඉවරයි” බුද්ධික පවසයි.

“මට හිතෙන්නෙ දැන් ඉන්න කොල්ලො කෙල්ලන්ට පිස්සු කියලා. මොනවද මේ කියන සම්ප‍්‍රඵලාප. බජාර් භාෂාවක්නෙ. කෑලි බෑලි කියන්නෙ ඇයි සම්පූර්ණ ඒවා නැද්ද..කාට වුණත් අපි ගෙරවයෙන් කතා කරන්න  ඕන. ඔය කියන එවුන්ට අම්මලා අක්කලා නැද්ද… මගෙ එකෙක් කීවා නම් මම මෙලහට මගේ ළමයා මකලා හරි හදලා.” කෑගල්ලේ ආර් නන්දසේන පවසයි. ඔහු විශ‍්‍රාම ගිය රජයේ සේවකයෙකි.

“කොල්ලො කෙල්ලන්ට කෑල්ල බඩුව කියනවා මට ඇහුණොත් ඇත්තමයි මගේ ඇගේ මාලු නටනවා. මොන ජරා කතාවක්ද ඒ… ඒ වගේ වෙලාවට එහෙම කියපු කෙනාට මමත් හොදට කියලා දෙනවා.”ඉඩම් කොමසාරිස් දෙපාර්තමේන්තුවේ සේවයේ නියුතු 24 හැවිරිදි සෞභාග්‍යා එලෙස පවසයි.

“අපිට නම් පිරිමි ළමයි ඔය වගේ කතා කියනවා අඩුයි. මට හිතෙන්නෙ ගෑනු ළමයිනුත් වැරදියි. තමන්ගෙ ඇදුම පැළදුම කතා බහ හැසිරීම සංවර කර ගන්නවා නම් ඔය කතා අහන්න වෙන්නෙ අඩුවෙන්” කැලණිය විශ්වවිද්‍යාලයේ උපාධි අපේක්ෂිකාවක් වූ වරකාපොළ නිශා පවසයි.

දැන් දැන් තරුණියන්ද තරුණයන් හැදින්වීමට විවිධ නම් භාවිතා කරන බව දැකිය. පොර ඩයල් එක කේස් එක බුවා ආදීය එලෙස භාවිතා කෙරේ. තරුණයෙක් වැදගත් නම් ඔහු නැණ නුවණින් සපිරි නම් ඔහු පොරක් බව මාවනැල්ලේ සදමාලි පවසයි.ඇය උපාධියක් හිමි රැකියා අපේක්ෂිත තරුණියකි. තරුණයන් පොරක් යනුවෙන් හදුන්වන්නේ යම් තැනක කැපී පෙනෙන්නට දගලන තරුණයෙකුට බව ඇගේ අදහසයි. බුවා යනු වයස 35ක් 40ක් පමණ වූ පුද්ගලයෙකුටය. බොහෝ විට බුවාගේ බිරිද බුවීය. නිතර නිතර මත්පැන් බී රංඩු කරන අල්ලපු ගෙදර අංකල් කේස් එකක් බව සදමාලිගේ අදහසයි.

“අපි ගෑනු ළමයින්ට නම් කියනවා නම් එයාලත් අපිට නම් කියන එකේ වැරුද්දක් මම දකින්නෙ නැහැ. හැබැයි ඒකේ මොකක්දෝ නොගැලපෙන ගතියක් තියෙනවා කියලා මට හිතෙනවා. කෙල්ලො එහෙම කියනවත් මම වැඩිය අහලා නැහැ” රාජගිරියේ මාලන් පවසයි. ඔහු උසස් පෙළ දෙවන වරට පෙනී සිටින සිසුවෙකි.

වර්තමානයේ තරුණ පරම්පරාව යොදා ගන්නා මෙම විවිධ නම් භාවිතා කිරීම ආරම්භ වූයේ කවදාදැයි නිශ්චිතවම කිව නොහැකි වුවද ඒ සදහා දශකයකටත් වැඩි කාලයක් ගතව ඇතැයි සිතිය හැකි බව සමාජ නිරීක්ෂකයෝ සදහන් කරති. තරුණ පරම්පරාව මෙවැනි ප‍්‍රවණතාවයක් කෙරෙහි නැඹුරු වීමට විවිධ හේතුන් බලපාඇතැයිජයවර්ධනපුර විශ්වවිදයාලයේ සමාජ විදයා අධයනාංශයේ ප‍්‍රධානි ආචාර්ය ප‍්‍රණීත් අබේසුන්දර පෙන්වා දෙයි.

“මේ වෙනකොට සමස්ත ලෝකයම බොහෝ සෙයින් වෙනස් වීගෙන යනවා. ශී‍්‍ර ලංකාවේ තත්වයත් ඒකමයි. ආර්ථික සමාජයීය දේශපාලනික වශයෙන් ලංකාවත් වෙනස් වෙමින් පවතිනවා. ඒ යටතේ සංස්කෘතිය පවා වෙනස් වෙලා. භාෂාවත් වෙනස් වෙලා. විශේෂයෙන් තරුණ පරපුරේ භාෂා විලාසයේ ලොකු වෙනසක් දක්නට ලැබෙනවා. ඒකට විවිධ හේතු බලපාලා තියෙනවා.”

” විශේෂයෙන් මාධ්‍යයේ හැසිරීම මෙරට සංස්කෘතිය වෙනස් කිරීමට සමත් වෙලා තියෙනවා. අනෙක් කාරණය තමයි අද අපේ රට විශාල ලෙස ලෝකයට විවෘත වෙලා. අන්තර්ජාල පහසුකම් ඉන් විශේෂයි. මේ දේවල් භාවිතා කරන අපේ තරුණ පරපුරේ ස්වයං පාලනය ගිලිහිලා. ඒ නිසා වටිනාකම් ධර්මතා ගැන තැකීමක් නැතිවෙලා. ලෙෘකික අංශයට බෙහෙවින් නැඹුරු වුණ තරුණ පරම්පරාවක් අද දැකිය හැකියි”

“කාමුක සරාගී දේවල් පිළිබද මේ අයගේ අවධානය ඉහළයි. මා සිතන්නේ මෙවැනි දෙවල් මේ භාෂා භාවිතයන් කෙරේ බලපාලා තියෙනවා. මේවා වලක්වාගන්න නම් තරුණ පරම්පරාව තමන් තුළ ස්වයං පාලනයක් ඇති කරගත යුතුයි.” යැයි ආචාර්ය ප‍්‍රණීත් අබේසුන්දර පවසයි.

The changes that have taken place in the social, economical and political fronts in the country have also resulted in a cultural change as well. The cultural change has resulted in bringing forth a new trend of name calling among young girls and boys. Social analysts say that the handling of the media and wider access to Internet has influenced society while also reducing their power of self-control. The many names used by boys to address girls and vice versa have so far gathered mixed reactions from society. The young have found it a common occurrence while the older generation considers it to be despicable.